Kuri uyu wa 2 Ugushyingo, umwaka wa 2021, nibwo Minisitiri w’Ubucuruzi n’Inganda  Béata U. Habyarimana yageze mu ntara y’amajyaruguru, mu ruzinduko rw’akazi  rwagombaga gutuma asuura ibikorwa by’inganda biherereye mu turere twa Musanze, Burera ndetse na Nyabihu, ndetse no kuganira na bamwe mu bagize amakoperative y’abahinzi ndetse n’aborozi bakorana bya hafi n’izi Nganda, mu buryo bwo kuzigezaho umusaruro cyangwa se umukamo w’inka zabo.

Uruganda yahereyeho, ni  urutunganya amata ndetse n’ibiyakomokaho rwa Burera Dairy, rukaba rwubatse mu karere ka Burera. Mu biganiro yagiranye n’abahagarariye uru ruganda, bamumenyesheje ko ubu basigaye bakira amata menshi ugereranyije n’uko byahoze kera, ibi bikaba biterwa n’uko mbere umworozi yagurirwaga amata ahawe amafaranga 180 y’U Rwanda kuri litiro imwe, ariko ubu igiciro umworozi agurirwaho cyarazamutse kuko ubu asigaye yishyurwa amafaranga  y’u Rwanda 200 aho kuba 180 frw, ibi bikaba byaratumye aborozi bagemura amata kuri uru ruganda bashishikarira gukomeza kugemura amata kuri uru ruganda, rwubatswe na Leta muri gahunda ya “ Uruganda iwacu”, nyuma rukaza guhabwa abikorera ku giti cyabo.

Kimwe mu bibazo abahagarariye ikusanyirizo ry'amata rya CEPTL rikorera hafi ya Burera Dairy bakunze kugaragaza, ni uko bari bakeneye ahakorera ikusanyirizo ryabo ry’amata rigezweho, Minisitiri Béata yabamenyesheje ko aho bazubakirwa ikusanyirizo ry'amata rigezweho hamaze kuboneka, ndetse ko n’ingengo y’Imari y’iki gikorwa ihari, abasaba gukomeza kunoza umurimo wabo wa buri munsi.

Béata U. Habyarimana yavuye mu karere ka Burera  yerekeza I Musanze ahari uruganda ruzwi nka “Hollanda Fair Foods” rukaba rutunganya umusaruro w’ibirayi rukawukoramo amafiriti. Abahagararariye uru ruganda babwiye Minisitiri ko aya mafiriti azwi nka “ Winnaz” kugeza ubu abarizwa mu maguriro asaga Magana ane ya hano mu Rwanda, ndetse aba bakaba bashaka kwagura isoko, kuko batangiye no kugeza aya mafiriti no mu bihugu duturanye!

Mu butumwa Minisitiri yagejeje ku bari aho, yabasabye gukomereza aho bageze ngo bakomeze no guteza imbere amakoperative y’abahinzi b’ibirayi. Yagize ati:

"Gutinyuka ikintu nk'iki abandi batigeze bakora mu Rwanda, ni uguca inzira mu ishyamba.Ubu butwari mubukomeze, mukorane n'Amakoperative y'Abahinzi b'Ibirayi, mwagure uruganda, mwongere imashini, bityo tubone umusaruro haba mu bwinshi ndetse no mu bwiza”

Tukiri kuri iki gihingwa cy’ibirayi kandi Minisitiri yanasuye uruganda ruzwi nka “ Nyabihu Potato Company”, aba nabo bakora ubwoko bw’amafiriti buzwi nka “Crisps” ariko mu rwego rwo kwagura imikorere babwiye Minisitiri ko bagiye kwagura ibikorwa bagakora n’ubundi bwoko bw’amafiriti bumenyerewe na benshi ndetse bunakoreshwa no mu ngo zitandukanye buzwi nka “french fries”.

Mu zindi nganda zitunganya amata ndetse n’ibiyakomokaho, yanasuye uruganda rutunganya amata rwa Mukamira, ndetse anaganira n’abagize amakoperativey’aborozi  ahagemura amata, bamugezaho imbogamizi bahura nazo nawe ibibazo byabyo abiha umurongo w’uko bigomba gukemuka, ariko cyane cyane anagaruka ko uruganda rugomba kugirira akamaro abaturage bihereye ku bagize amakoperative y’aborozi bahagemura amata.

Uru ruzinduko rw’akazi  Minisitiri yarusozereje ku ruganda rwa “ Ingabo Dairy” narwo rutunganya amata n’ibiyakomokaho”. Minisitiri yasabye abahagarariye uru ruganda kwagura imikorere bongera imashini, bagahaza isoko ryo mu Rwanda ndetse no hanze yarwo.

Biteganyijwe ko ingendo nk’izi  Minisitiri Béata U.Habyarimana azazikomereza no mu zindi ntara zigize igihugu mu rwego rwo gusura inganda, no gushyira ingufu mu mikoranire yazo n’amakoperative.